Am Arsch vom Rägäbogä hets üs zwöi a Bodä zogä.

Am Arsch vom Rägäbogä

hets üs zwöi a Bodä zogä.

Und es wär glogä, würdi sägä,

i heig nid versuecht entgägäzhäbä

aber i bi däm Sog erlägä.

Wüui ä Stimm i mir ha gchörä sägä:

Hey, wiso ni losla?

Und wo mini Bei hei afa nachägä,

hani losglah.

Ha mi nüme mögä häbä, nüme mögä sta.

S eifach la passierä

und mi eifach mau la ga.

Um mi gmeisam mit dir eifach z verlürä

und nie wider füre z cho.

Ize simer hie und

gchörä dr Rägä

und i gchörä di sägä:

Shit, mir hei ke Schirm mitgno.

I gseh dassde friersch und

merkä, ds säch dr Bogä het verschobä.

S rägnet nüm näbä üs sondrn übr üs obä.

Plitsch – Platsch – Rägätropf.

I gchörä Rägätropfä

über dini Marmorbackä loufe,

hopsä.

Warm.

Während mir im Rägä hockä.

Chaut.

I packä di am Arm,

irgendwo här chunnt Lärm.

Haut.

I wott dir sägä: Du chasch di a mir häbä.

Aber i blibä in Gedankä chläbä.

Si si dr Lärm;

Gedankä wo mir Chopfweh gäbä,

wüu si umerase uf dr Outobahn i mim Hirni.

Si brätschä ad Wänd und enand entgägä,

fahrä inänand und i mini Stirn dri.

Plitsch – Platsch – Rägätropf.

I gchörä dr Rägä.

Und ig merkä vouer Schrekä,

i bi blibä steckä.

Di ganzi Sach isch verchert irgendwie.

S isch dr angr Wäg umä.

Mir hockä garnid zämä,

sondern du dert und ig hie.

Mir hockä beidi ungerem Rägäbogä.

Aber nid beidi am glichä Ändi.

Und i ha bis iz vergäbläch a dä Farbä zogä,

und gmeint i zie di und mir hautä Händli.

Aber i bis wo säch häbt a dir.

Ha gmeint mir gö verlorä, zämä z Bodä,

touchä ines Abentür.

Abr i ha mi verlorä irä Illusion, ganz älei,

i däm Biud woni ha gha vo dir,

bezihigswis vo üs zwöi.

S het mi so a Bodä drückt,

und i ha gmeint ds sig dr Troum.

Und i bi so lang blibä hockä,

wüui ha gmeint du gspürsch ds ou.

Und ersch ize chani ds la ga,

wüui i ha gmerkt ds mir ds beidi garnid wei.

Ersch iz chani witrga, stah wider uf dä Bei.

Wüu ig ha realisiert:

viu lieber aus mit dir bini eigentläch alei.

Und dsmä nüt verliert,

wenn ä Troum is Wasser gcheit.